أمينة بتقولك

مطلقة .. و بحب طليقي

مطلقة .. و بحب طليقي , من أكتر من خمس سنين و أنا بطلب الطلاق من جوزي ، لأني حسيت إني مش قادرة أكمل معاه .. بعيداً عن أسباب الخلافات و بعيداً عن أسباب الطلاق ، حاولنا إننا نكمل مع بعض ، حاولنا نحل خلافتنا ، و لكن كل محاولتنا باءت بالفشل ، و بعد 3 سنين من المحاولات و بعد 10 سنين من الجواز .. اتطلقت .. أيوه اتطلقت .. اتطلقت من غير محاكم و لا قواضي ، من غير ما ارفع قضية طلاق و لا قضية نفقة و لا قضية حضانة و لا قضية رؤية .. اتفقنا و اتنازلنا و اتفاهمنا و اتطلقنا ..

و عدت فترة صعبة عليه ، خصوصاً إن عندي ولد جميل هو كل حياتي ، و هو أغلى ما في حياة باباه (طليقي).. و استمرت علاقتي بطليقي ، علاقة محترمة ، مبنية على حب إبني و إخلاصنا و تفانينا في إسعاده ، يمكن فشلنا إننا نسعد بعض و احنا مع بعض ، لكن بنحاول نشوف سعادتنا في سعادة إبننا ..

بحب طليقي .. طبعاً لازم أحب طليقي ..بحبه لأني عيشت معاه كل اللحظات .. مابين لحظات حلوة و لحظات صعبة

بحب طليقي لأننا كلنا مع بعض عيش و ملح لسنين .. بحب طليقي لأقوى سبب في الدنيا ، بحب طليقي لأنه أبو ابني .. لأن إبني حته منه ، و مش معنى إننا إنفصلنا يبقى أكرهه أو اتعامل معاه بصورة سيئه ، بالعكس .. لازم إيدي تفضل في إيده علشان خاطر إبننا ..

في عيد ميلاد ابني ، لازم يكون باباه موجود ، و بتكون معاملتنا و علاقتنا بابننا ممتازه في اليوم ده ، و لما إبني بيتعب ، أنا و بابا بنوديه للدكتور مع بعض ، لأنه لازم يحس بوجودنا معاه ، لما بتحصل مشكلة في مدرسته ، لازم نروح أنا و باباه و نتابعها .. و هكذا في امور كتير ..

لا من شك إن إبني متأثر جداً بإنفصالي أنا و باباه ، و لكن وجود علاقة طيبة بيني و بين باباه ، بيقلل من مدى التأثير السلبي للطلاق عليه .

لو أنت أو أنتي شايفين الحياة صعبة بينكم و مش هاتقدروا تعيشوا مع بعض و بينكوا أولاد ، إنفصلوا بهدوء ، إنفصلوا من غير مشاكل و لا خناقات و لا محاكم ولا قضايا ..

لو شايفة إن إنفصالك و طلاقك من جوزك هايستلزم أو يشترط إنك تتنازلي عن المؤخر و النفقة و الكلام الفاضي ده ، إتنازلي .. أصل مهما كان المبلغ إللي هتاخديه ، فهو مش هايبقى حاجة قدام نفسيتك و نفسية إبنك أو بنتك إللي هاتتدمر بسبب القواضي و المحاكم و المشاكل بينكوا

لو أنت شايف إنك تقدر تديها حقوقها ، إديها و إعتبرها إحسان و مودة لأم إبنك أو بنتك ..

بلاش تفقدوا إحترامكوا لبعض و تفقدوا إحترام أولادكم ليكم علشان كام ألف ممكن تصرفوا أضعافهم في المحاكم و القضايا أو عند دكاترة الأمراض النفسية .

ماتدخلوش حد بينكم و اتفقوا انتوا مع بعض ، علشان انتوا مش صغيرين ، و علشان لو أي حد اتدخل في المشكلة مهما كانت قرابته ، فهو مش هايتأثر زي ما أولادكوا هايتأثروا .

لو إنفصلتوا و بينكم أولاد خلوا دايماً فيه تواصل ، علشان دايماً و لادكوا يبقوا عارفين إنكوا إيد واحدة ، و مايجيش الوقت إللي يستغلوا إنفصالكوا ده ضد مصلحتهم و هم مش حاسيين ..

لو إنفصلتوا و بينكم أولاد .. إتنازلوا شوية .. إتنازلوا علشان تحافظوا على قيمة أكبر من قيمة الجواز إللي ماعرفتوش تحافظوا عليها .. علشان تحافظوا على أولادكوا و نفسيتهم و حياتهم .

 

إنفصلي و حبي طليقك .. إنفصل و حب طليقتك حبوا بعض حب مصلحة لولادكم

الوسوم

Rokaia hussien

رقية حسين , خريجة سياسة واقتصاد اشتغلت في مجال تحرير الأخبار الصحفية في جرائد مطبوعة وبعد الجواز قررت اشتغل في المواقع الاجتماعية وانضميت حديثاً لموقع أمينة توداي وأتمني اكون اضافة لعالم جديد عندي شغف اكتشفة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *